ДРАМАТА "КАМЕЊАТА ОД СТЕФО НАНЦУ 1200 ПАТИ НА СЦЕНА

04.06.2014 година

Минатиот петок, 23 мај, Зил театарот повторно ја прикажа една од најгледаните драми во Австралија Камењата од Стефо Нанцу. Двајцата протагониости Стефо Нанцу и Том Ликос со својата напрегната и динамична изведба од 90 минути направија вистинска сензација во Сиднеј. Двајцаста се едни од најдобрите глумци во Австралија и преставата се здоби со светска репутација како најуспешна престава за млади.

 

 

 

Одржана свечената Академија за Браќата Свети Кирил и Методи во Сиднеј

26.05.2014 година

Во неделата на 25ти мај, 2014 година, со најголеми почести се одржа чествување на славните Браќа Свети Кирил и Свети Методи Солунски.
Македонскиот Просветно Училишен Одбор за Нов Јужен Велс , како и секогаш, натпросечно ја организира оваа величенствена свеченост на која присуствуваа родителите и учениците кои го изучуваат македонскиот јазик во етничките и редовните основни училишта, како и во саботните средни училишта. Свеченоста се одржа во Црквата Свети Кирил и Методи во Сиднеј.

 

 

 

Донаторска вечер во Мелбурн

19.05.2014 година

Во Мелбурн, во Гранд Адреналин се одржа Хуманитарна акција за собирање финансиски средства за Northern Health Foundation од Епинг.
На самиот почеток гостите ги поздравија Претседателот на Австралиско Македонското Ромско Друштво од Мелбурн - Суат Ејвазов, и Претседателот Јашар Али од Викторија Романо Пралипе од Мелбурн (ромско братство) кои говореа за идните планови на друштвото и воедно им се заблагодарија на присутните и ги преставија специјалните гости на таа вечер.
Генералниот Конзул на Република Македонија Бети Коруновска им го честита верскиот празник Ѓурѓовден на Ромите како и денот на мајката кој се прославува во Австралија, притоа поздравувајќи ја идејата на Ромите кои преку оваа акција покажаа дека се добри, хумани луѓе и дека и во иднина ке продолжат по истиот пат.
Официјалните преставници од Епинг болницата јавно се заблагодарија на донацијата во износ од 2,000 долари што ја примија како подарок од двете ромски друштва и тоа: Австралиско Македонското Ромско Друштво од Мелбурн и од Ромското братство од Мелбурн.
Според зборовите на Претседателот - Суат Ејвазов се очекува да има повеќе вакви акции во текот на годината затоа што преку вакви акции се докажува дека кога некому му треба помош, тие се тука да им помогнат на своите сожители во Мелбурн.

 

 

 

ПОЧИНА ПРОФ. Д-Р НАУМЕ РАДИЧЕСКИ

07.05.2014 година

Во понеделник на 5-ти мај по долго боледување почина нашиот драг пријател и соработник проф. д-р Науме Радически. Роден е во село Дабово (Мешеишта) крај Охрид на 18-ти мај 1953 год. На Филолошкиот факултет во Скопје во 1975 год. завршил студии по историја на книжевноста, а на Филозофскиот факултет студирал историја на уметноста со археологија. На Филолошкиот факултет Блаже Конески во Скопје, на кој работи повеќе од три децении, магистрирал(1981) и докторирал (1990), а до смртта беше професор на катедрата по современа книжевност. Освен македонската литература во минатото и во современоста, негова научна тема се Македонците кои во минатото создавале литературно творештво на другите соседски јазици. Учествувал во подготовки на неколку списанија, а составувач е и на избори од македонската литература. Автор е на повеќе поетски дела и книги со критичко-есеистичка и научно-истражувачка проза.
Проф. д-р Науме Радически беше соработник со Македонското литературно друштво Григор Прличев од Сиднеј од 1979-та година. На многу членови - поети тој им напишал рецензии за нивните книги и секако јазично ги корегирал. Поради неговиот придонес за литературното друштво, проф. д-р Науме Радически е прогласен за негов почесен член. Со неговата смрт покрај семејството Радически, неговата празнина ќе ја почувствуваат Друштвото на писатели од Македонија каде е нивни долгогодишен член, литературното друштво Григор Прличев, а и многу други друштва и асоцијации во Македонија и во светот.

 

 

 

БОРЕЊЕ СО МЕЧКА

05.05.2014 година

Австралиско македонскиот театар од Сиднеј на турнеја во Република Македонија со драмата
БОРЕЊЕ СО МЕЧКА

Деновиве Австралиско македонскиот театар од Сиднеј ја објавија овогодишната програма за своите театарски престави и најновите проекти преку кои ќе се промовира македонската култура во Австралија.
Исто така Театарот одлучи со познатата драма Борење со мечка која минатата година во Австралија беше прикажана на македонски и англиски јазик во јуни да гостува во Република Македонија. Се планира истата да ја престави пред пошироката публика во градовите: Скопје на 4-ти јуни, Велес на 6-ти, Штип на 7-ми, Струмица на 9-ти, Прилеп на 11-ти, Битола на 13-ти и Охрид на 14-ти јуни. Во Прилеп ќе земе учество на 49-тиот Драмски фестивал Војдан Чернодрински. Автор на драмата Борење со мечка е Душан Ристевски, а се прикажува во режија на Стефо Нанцу и истата е најгледана македонска драма во Австралија.


Ова е втора турнеја на овој реномиран Театар во Македонија. Во 2011 година Театарот забележа огромен успех при нивното гостување во Македонија каде посетија осум градови со драмата Мр Балкан. Досега овој Театар за само неколку години од своето постоење ги има прикажано драмите: Страв и срам, Мр Балкан, Стари и весели, Раскол, Остави ја свеќата да гори, Борење со мечка.
Иван Трпоски

 

 

 

СЕМАКЕДОНСКА ВЕЧЕР

02.05.2014 година


КУД Александар Македонски III, организира игранка оваа сабота(3/5/2014), со почеток во 6.30 pm во прекрасната црковна сала на црквата Света Злата Мегленска одHoppers Crossing (12-14 Lentini st. Hoppers Crossing).

Со гордост ги покануваме сите љубители на македонските традиционални ора и сплетови да ја посетат оваа прекраснаСемакедонска вечер. На оваа вечер ќе се претстават 8 групи од три културно уметнички друштва: Бисер од Џилонг, Илинден од Footscray и Александар Македонски III. После настапот на културно уметничките друштва продолжуваме со веселба со музичката група Спектар, до раните утрински часови.
Влезницата е само $15 за возрасни и $10 за деца над десет години.

 

 

 

ВЕЛИГДЕН ПРОСЛАВЕН ВО МПЦ СВЕТИ НИКОЛА - ПРЕСТОН

23.04.2014 година


Македонците ширум Австралија го прославија големиот Христијански празник Христовото Воскресение..
За христијаните, Велигден е празник на љубовта и мирот и симбол на триумфот на животот над смртта.
Христијанството н поучува на почитување на духовните вредности, но и на човекољубие и милосрдие, посочувајќи дека сите сме исти пред Бога и дека љубовта, почитувањето на различните, семејните вредности и човечката добрина секогаш се возвраќаат.
Како и по традиција на овој ден голем број Македонци присуствуваа во Македонскиот православен храм Св. Никола во Престон, свето место со најмногу верници, на овој голем празник кај Македонската заедница.
Вечерната богослужба започна во 23 часот се до 23,45 часот каде сите верници и свештенството се упатуваат надвор пред храмот и се започнува со вртење околу истиот.
Оваа година се забележа присуството на повеќе млади верници и многу студенти од Македонија што се школуваат во Мелбурн, а меѓу верниците беа забележани и неколку млади Руси.

Следеше читање на Велигдненското послание од Надлежниот Епархиски Архиреј Владиката Г-дин Петар.
Христос Воскресе. Навистина Воскресе!

 

 

 

Македонските камбани бијат и во Европа и во Австралија

23.04.2014 година


Верските храмови во дијаспората, покрај тоа што служат за практикување на црковните обреди, се и место за дружење на македонските иселеници. Таму заедно го поминуваат велигденскиот ручек, а навечер подготвуваат празнични забави

Иако се иселени во други земји и далеку од своите огништа, сепак Македонците наоѓаат начин на афирмирање на православната вера, култура, традиција и обичаи. Преку славењето на религиозните празници им ги пренесуваат обичаите на своите деца. Велат дека, и покрај тоа што не се во татковината, не постои нешто што би ги намалило нивната значајност и потребата од достоинствено одбележување.

Токму велигденските празници го поттикнуваат нивното зближување и дружење. Тогаш македонските православни цркви се масовно посетени. Свештениците што го одржуваат духовниот живот во Европа и во Австралија раскажуваат за своите претпразнични подготовки, како и за редот по кој според правилата на Македонската православна црква-ОА се одвиваат литургиите, кои масовно се посетени од верниците.

Сепак, треба да се напомене дека верските храмови во дијаспората, покрај тоа што служат за практикување на црковните обреди, се и место за дружење на македонските иселеници. Таму заедно го поминуваат велигденскиот ручек, а навечер подготвуваат празнични забави.

Младите ги негуваат обичаите во Швајцарија

Почнувајќи со Лазарева сабота, а потоа Цветници, во единствениот новоизграден духовен објект во германскиот дел на Швајцарија во Тринген, посветен на свети Наум Охридски, велигденските празници почнуваат да се слават со заедничка молитва. Отецот Горан Мантаровски раскажува како Македонците што живеат во тој дел од Европа се подготвуваат да го прослават Велигден.

Вели дека голем број верници доаѓаат да се исповедаат, да се причестат и да се консултираат како да постат последната недела од велигденскиот пост.

- Оваа година на овие два празника кај нас ќе биде и европскиот владика Пимен, со кого ќе се одржат две богослужби - додава отецот Горан.

На Лазарева сабота, вели отецот, имавме деца од нашите македонски училишта што ќе бидат присутни на литургијата, а потоа заедно се учиме за верата Христова и за традицијата за православните обичаи. Заедно ги приготвуваме и велигденските јајца.

- На велигденската богослужба имаме многу наши верници што доаѓаат од сите краишта на Швајцарија. Црковната општина од Тринген организира голема велигденска забава. Значи, по богослужбата сите одат на најголемата велигденска прослава во Европа - вели отецот Горан.

За сето тоа му благодари на Бога и се надева дека ќе продолжи да ги поучува младите, за да не ги заборават нашите традиции и обичаи и да ја чуваат нашата православна вера.

- За мене како свештеник во Швајцарија ми причинува најголема радост кога и во неделните богослужби, ќе видам како децата во ред, кротко и смирено пристапуваат кон светата тајна причест - вели отецот Горан.

Црквата во Лондон била најубава

Во Лондон, по иницијатива на мала група православни христијани, во 1993 година се формирала црковна општина посветена на свети Архангел Михаил и сите свети ангели, која успевала да организира богослужби само еднаш годишно за Велигден. Но жедта за црквување и духовно растење во верата кај помала група православни Македонци тлеела од поодамна, па затоа во 2007 година бил назначен свештеник за оваа црковна општина. Веќе од наредната година бил изнајмен храм од Англиската црква во населбата Сохо во Лондон. Таму се богослужи на македонски јазик.

Отецот Виктор вели дека во недела обично има педесетина верници, но се собираат и по 80-90 луѓе. Истакна дека поради географската големина на Лондон и оваа бројка е задоволителна.

- Ако го прашате владиката Пимен која од црквите е најубава, ќе ви рече дека тоа е таа во Лондон, иако не е изграден македонски храм - додава отецот Виктор.

Во 2010 година е формирано и неделно црковно училиште по македонски јазик, кое го посетуваат петнаесетина деца. Оваа година се отвориле уште три паралелки, една во Лондон и по една во Нортхемптон и во Оксфорд.

Сепак, најголемата прослава се случува за Божиќ, а особено на Велигден, кога во нашата мала црква може да има и по 600-700 верници.

- Ова е празникот кога особено децата и возрасните се највозбудени и најрадосни. Тоа е празник за очите и за душата - додава отецот.

Во Италија се слави исто како и во татковината

Црковната општина Свети Прохор Пчињски во Пјаченца е една од двете цркви што функционираат во Италија. Неа ја сочинуваат околу 5.000 Македонци што живеат во градот и во околината. Отецот Климент Мишањ веќе четири години го развива тамошниот духовен живот.

- Минатата година го прославивме десетгодишниот јубилеј. Секоја недела и празник во текот на годината се богослужи света литургија според типикот на Светата црква. Така, и за време на велигденските празнувања, се постапува според определеното правило за богослужение, исто како и во татковината - вели отецот Климент.

Оваа година за Велигден, додава отецот, ќе бидат удостоени со присуството на владиката Пимен, кој ќе ги води богослужбите за време на Страсната седмица и Воскресението Христово.

Богослуженија имаме преку неделата на Величетврток ќе се отслужи света архијерејска литургија во Неиве, каде што се наоѓа другата наша црковна општина, под духовно раководство на протојерејот Михајло Матевски, а на која ќе се подготват пригодни дарови што ќе се користат во текот на годината за причестување болни. Истата вечер, со почеток од 19.30 ч., ќе се читаат 12-те многустрадалните евангелија. Во неделата, на Велигден, ќе има утринска литургија и читање на Воскресното евангелие на разни јазици, а вечерта ќе се организира велигденска забава.

Река од верници во Австралија

Прославата на празниците е обединувачка алка меѓу верниците. Тоа го зацврстува ткивото на македонскиот идентитет на оние што живеат далеку од матичната земја. Вака отецот Спасе, свештеник во пензија, раскажува за своите искуства додека служел во црквите во Австралија.

- Нема отстапувања во практикувањето на црковниот живот. Сѐ се прави исто како и во црквите во Македонија - одговара отецот Спасе.
Се присетува дека околу црквата во Мелбурн се правела река од верници. Таа слика изгледала волшебно. Дури и полицијата морала да обезбедува.

- Таму велигденските празници се работни денови, па затоа верниците одат во црква по завршувањето на дневните обврски. Тогаш започнуваат црковните обреди - додава свештеникот.

Според него, масовната прослава на Велигден во Австралија предизвикува голема заинтересираност во австралиската јавност, а особено кај другите етнички заедници.
превземено од Нова Македонија