Соопштенија

Обраќање по повод доделувањето Повелба на Република Македонија на здруженија од дијаспората

22.07.2015 година

Вторник, 21 Јули 2015
Почитувани присутни,
Дами и господа,
Браќа и сестри,

Чест ми е да ве поздравам во нашата заедничка татковина, Република Македонија.

Македонската дијаспора секогаш давала големи луѓе. Еден од нив е и македонскиот револуционер, новинар и публицист, Ангел Динев. Во 1935 година, пред точно 80 години, Динев започнал да го издава неделникот „Македонски вести", кој одиграл многу значајна улога во ширењето на идеите за слободна и самостојна Македонија.

Меѓу бројните текстови, еден е целосно посветен на улогата на македонската дијаспора.

Во оваа своевидна декларација за дијаспората, Динев вели дека дијаспората треба да ги култивира кај своите сонародници македонската самосвест и македонското национално самочувство, во чии души треба да поддржува љубов спрема татковината... Дијаспората треба да го развива чувството на заемна љубов и самопомош меѓу своите сонародници. Да ги чува македонските обичаи, песни и умотворби... Да ги велича и да ги цени високиот идеализам и подвизите на своите татковци и дедовци... И, со сè што прави, да создава пријатели на Македонија.

Драги пријатели,

Денес сме тука за да им се заблагодариме на пет организации кои го исполнуваат заветот на Динев.



Ансамблот „Македонка" го прошири македонското оро во Канада и пошироко. Многу добро се сеќавам на прекрасните ора што ги игравте пред две години, во црквата „Св. Климент Охридски" во Торонто кога бев во посета на пријателска Канада. Со вашата игра вие целосно го доловивте македонскиот дух на непокор.

Тука се и членовите на Австралиско-македонскиот театар од Сиднеј, кој со автентични македонски драми секогаш успева да адресира важни општествени теми и да пренесе значајни пораки и за Македонија и за Австралија.

Охридското социјално друштво од Мелбурн останува доследно на заветот на големиот лекар на душата и на телото – Св. Наум Охридски. Со вашите инвестиции во здравството, вие секогаш им помагате на сонародниците од Македонија.

Со нас се и претставници на Македонско-француската асоцијација, која веќе цела деценија го негува делото на големиот Блаже Конески и го утврдува македонскиот јазик како наша единствена комплетна татковина.



Културното и спортско друштво „Преспа-Бирлик" од Шведска само по себе е сведоштво за мултиетничноста на македонската дијаспора, за придобивките на македонскиот модел на соживот и почитување и прифаќање на различноста.

Сите вие сте живата врска на Македонија со светот. Вие сте наши амбасадори на полето на културата, уметноста, образованието, добротворството и спортот.

Секој ваш успех е и успех за Македонија. Колку поуспешни поединци, толку поуспешна Македонија.

Затоа, како претседател на Република Македонија во името на македонските граѓани, но и во мое, лично, име сакам да ви се заблагодарам за сè што правите за Македонија. А Македонија памети, препознава и вреднува.

Затоа, со Повелбата на Република Македонија ви се заблагодаруваме и, воедно, ве покануваме и вас и целата дијаспора да соработуваме и да се сплотуваме. Да бидеме пример за оваа и за идните генерации.

Дами и господа,

Започнав со Динев и со него сакам да завршам. На едно место во декларацијата за дијаспората, тој предупредува дека „со распокинати сили, во натегната атмосфера, при заемна недоверба... самите си нанесуваме штета едни на други..."

Овој опис, за жал, премногу потсетува на атмосферата во која денес сè уште се наоѓа Република Македонија.

И македонската дијаспора е загрижена за оваа состојба, бидејќи, сè што се прави во татковината неминовно се рефлектира и на дијаспората. Не смее да се заборави дека Република Македонија не е само држава на македонските граѓани што живеат во неа, туку и татковина на нејзината дијаспора што живее надвор од неа.

Сакам да знаете дека, како што сме одговорни и пред граѓаните, така сме одговорни и пред дијаспората, која и во најтешките мигови за Македонија била тука, и секогаш ќе биде тука за нас. Верувам дека ќе ја искористите секоја можност за да помогнете и во овој период на предизвици. И дека сплотени ќе продолжиме да ја остваруваме заедничката визија – со тимска работа да ја направиме Македонија подобро место за живеење.

Ви благодарам.

 

 

 

,,Иселеничка културна средба“

20.07.2015 година

Почитувани,

Поради големиот интерес од страна на претставници на иселенички организации за промовирање на активностите поврзани со чување и негување на македонската култура во иселеништвото, Агенцијата за иселеништво ќе одржи ,,Иселеничка културна средба“ на 23 јули 2015 година, во Амфитеатарот на Министерството за надворешни работи на Република Македонија. Манифестацијата ќе биде со следниот редослед:

9:30 -10:00 часот: Пристигање, евиденција и кафе

10:00 часот: Поздравен говор

10:30 часот:Промоција на новоиздадена книга „Во друга светлина“ од Ивица Челиковиќ, иселеник од Гетеборг

11:00 часот:Промоција на новоиздадена книга „Шепотот на љубовта“ од Стојан Ѓоргиев, иселеник од Берлин

11:30 часот:Промоција на книгата „Одблесоци од вечноста“ од Нове Младеновски, иселеник од Мелбурн

12:00 часот:Пауза за закуска

13:00 часот:Презентација на АНСАМБЛ МАКЕДОНКА од Торонто, 55 годишен јубилеј од формирање, основач, Алек Петличков

13:15 часот:Презентација на 40 годишна настава по македонски јазик во Канада, наставник Благица Дафовска

13:30 часот:Презентација на наставата по македонски јазик во Словенија, наставник Зекирија Шаиновски

13:45 часот:Презентација на Македонско-Австралскиот театар од Сиднеј, Васко Србиновски

14:00 часот:„Како е претставена Македонија во данските библиотеки“ Силвана Миленкова од Македонско здружение Филип II Македонски


Васил Наумов

 

 

 

Повелби за заслуги за Македонија

10.07.2015 година

Почитувани,

Церемонијата на која Претседателот на Република Македонија Д-р Ѓорѓе Иванов ќе ги додели повелбите за заслуги за Македонија на иселеничките организации кои беа избрани за одликување од Комисијата при Кабинетот на Претседателот, ќе се одржи на 21 јули 2015 година во Клуб на пратеници Скопје, со почеток во 19:00 часот. Сите заинтересирани за присуство треба однапред да се најават во Агенцијата за иселеништво на контакт тел: 02 3118 633 или на интернет адресата info@minisel.gov.mk

 

 

 

Турнеја на Културно-уметничкото друштво од Торонто Канада

24.06.2015 година



Турнејата ќе започне на 6 јули со отварањето на Балкански фестивал на песни и игри во Охрид и ќе продолжи со следниот редослед:
-7 јули- Вевчани, настап на Вевчанско културно лето ,,ВЕКУЛ“ почеток 19:00 часот
-8 јули – Охрид, учество на Балкански фестивал на народни песни и игри ОХРИД
-11 јули-Дојран, настап на „Дојранско културно лето“ почеток во 20:00 часот
-12 јули-Валандово, настап на ,,ВАЛАНДОВСКИ ПЕТРОВДЕНСКИ СРЕДБИ“ почеток во 20:00 часот
- 13 јули-Струмица, настап на плоштад Гоце Делчев, почеток во 20:00 часот
-16 јули- Ресен, настап на Манифестацијата ,,70 ГОДИНИ ФОЛКЛОР ВО ПРЕСПА“
-20 јули- Овчарани, Република Грција, настап на иселенички средби, почеток 22:00 часот
-22 јули-Скопје, настап во салата на Драмски театар Скопје, почеток во 20:00 часот
-24 јули-Кратово, настап во Дом на Култура „Лазар Софијанов“ почеток во 20:00 часот
-28 јули- Прилеп, почеток во 20:00 часот
-29 јули-Битола, настап на Републички фестивал „ИЛИНДЕНСКИ ДЕНОВИ БИТОЛА“ на Широк сокак, почеток во 20:00 часот
-30 јули-Крушево, настап на „ЕТНО ГРАД КРУШЕВО“, почеток во 20:00 часот

Културно-уметничкото друштво од Торонто Канада, минатата година одбележа 55 годишен јубилеј, оставајќи зад себе бројни играорци од неколку генерации заслужни за негување и чување на македонскиот фолклор надвор од Македонија.
По повод заслугата за Македонија, Претседателот на Република Македонија на 21.јули 2015 година во Охрид, ќе го одликува друштвото со Признание „Повелба на Република Македонија“.

 

 

 

„Повелба на Република Македонија“

19.06.2015 година

ПОЧИТУВАНИ,

Во прилог Ви доставуваме информација за донесената одлука од страна на Претседателот на Република Македонија д-р Ѓорѓе Иванов, за доделување признанија „Повелба на Република Македонија“на македонски иселенички организации.
Одликувањата ќе бидат доделувани на 21 јули 2015 година во претседателската вила во Охрид. За терминот дополнително ќе Ве известиме.

Агенција за иселеништво

 

 

 

ИЗВЕСТУВАЊЕ ЗА ОДРЖУВАЊЕ НА ЛЕТНАТА ШКОЛА ПО МАКЕДОНСКИ ЈАЗИК

07.06.2015 година

Почитувани!

Ве известуваме дека Летната Школа по Македонски јазик наменета за деца потомци на иселениците од Македонија, со цел изучување на македонскиот јазик која Агенцијата за иселеништво ја организира секоја година, ќе се одржи од 4-10 август 2015 година.
Сместувањето на учениците и одржувањето на наставата ќе биде во хотел во Охрид. Агенцијата за иселеништво ќе ги сноси трошоците за наставниците кои ќе ја водат наставата, а хотелското сместување ќе биде на товар на самите учесници. Превозот до Охрид ќе биде во организација на родителите.
На „Летната Школа“ учество можат да земат сите заинтересирани, без претходна селекција.
За дополнителни информации околу сместувањето и цената ќе ве известиме во поблиска иднина.
Ве молиме присуството да го пријавите на интернет адресата на Агенцијата за иселеништво: e-mail:info@minisel.gov.mk
Благодариме за соработката




Директор,
Васил Наумов

 

 

 

Награда "Стојан Христов" за поетите иселеници од Македонија на Струшките вечери на поезијата

07.06.2015 година

Почитувани!

Согласно надлежноста на Агенцијата за иселеништво за помагањето на културниот развој на иселениците од Македонија, оваа година по шести пат Агенцијата за иселеништво, преку вклучување во Програмата на Струшките вечери на поезијата ќе доделува награда за поетите иселеници од Македонија.
За таа цел Ве замолуваме да ги известите членовите на Вашата организација кои се занимаваат со пишување поезија и кои имаат издадено книга, да се пријават во Агенцијата за иселеништво.
Книгите со кои ќе се конкурира ќе бидат оценети од страна на стручното жири на Струшките вечери на поезијата, а наградата за поетите иселеници од Македонија ќе ја додели Агенцијата за иселеништво на Република Македонија. Поетите можат да конкурираат и со постари дела.
Заинтересираните поети, иселеници од Македонија, своите дела треба да ги испратат во Агенцијата за иселеништво до крајот на месец јуни 2015 година.
Минатата година наградата "Стојан Христов" за најдобра збирка поезија ,,Анатомија на чувствата“ ја доби г-ѓа Лилјана Стоилковска Андоновска, иселеник од Македонија која живее во Шведска.

Директор
Васил Наумов

 

 

 

Travel Guide Macedonia

08.05.2015 година